Acampamento da mocidade 2010

A Saínza, Rairíz de Veiga 20, 21 e 22 de agosto

Mozos e mozas e asociacións de todo o país, xuntámonos, de maneira autoorganizada para facervos chegar esta proposta. Mocidade de Xinzo e da Coruña, de Lugo e de Cangas e dunha ducia de lugares máis decatámonos de que a mocidade rebelde galega precisa un lugar de encontro nacional, onde a pluralidade tanto temática, como de ideas, de gostos ou deportes, permita a participación, evitando desconfianzas absurdas, dunha grande cantidade de mocidade, da mocidade que está chamada a erguer nas próximas decadas un proxecto de loita e liberación importantísimo para o país. Así, decidimos avanzar neste relacionamento inevitable cunha proposta práctica, o “Acampamento da mocidade 2010”.

Neste acampamento atoparás mozas e mozos de todo o país con ganas de divertirse, de coñecerse, de formarse en valores anticapitalistas e con inquietudes moi semellantes ás túas. Nel poderás participar en debates, obradoiros, xogos, concertos... Além de entrar en contacto cunha fermosa terra e a mocidade limiá que este ano farán de anfitrións no marco inigualable do Festival da mocidade.

En definitiva, o 1º “Acampamento da mocidade” vai ser un lugar de encontro, de diversion e de formación en valores. Esperamos fagades dela un suceso para que se repita durante moitos anos.